Saturday, 10, July, 2021

पेरु कोपा अमेरिका फुटबलको सेमिफाइनलमा

एजेन्सी । पेरु जारी कोपा अमेरिका फुटबलको सेमिफाइनलमा पुग्ने पहिलो टिम बनेको छ ।

आज बिहान भएको क्वाटरफाइनल खेलमा पाराग्वेलाई टाइब्रेकरमा ४–३ गोलले पराजित गरेर पेरुले अन्तिम चारको यात्रा तय गरेको हो ।

निर्धारित तथा थप गरिएको समयमा ३–३ गोलको बराबरी भएपछि खेलको निर्णय टाइब्रेकरबाट लिइएको हो ।

निधारित समयमा पाराग्वेका लागि ११ औँ मिनेटमा गुस्ताभो गोमेज, ५४ औँ मिनेटमा जुनियर एलोन्सो र ९० औँ मिनेटमा गाब्रिएल एभालोसले गोल गरे । पेरुका लागि पहिलो गोल उपहारमा प्राप्त भयो ।

२१ औँ मिनेटमा पाराग्वेका गुस्ताभो गोमेजले आत्मघाती गोल गरे । ४० औँ मिनेटमा पेरुका जिएन्लुका लापाडुला र ८० औँ मिनेटमा योशिमार योतुनले गोल गरेका हुन् ।

पेरुका आन्द्रे कारिलोले सीधै रातो कार्ड पाए । त्यसअघि पहिलो हाफको इन्जुरी समयमा पाराग्वेका गुस्ताभो गोमेजले सीधै रातो कार्ड पाएका थिए ।

अतिरिक्त समयमा दुवै तर्फबाट गोल हुन सकेन, त्यसपछि भएको टाइब्रेकरमा पेरुले चार तथा पाराग्वेले तीन मात्रै गोल गर्न सक्यो ।