Tuesday, 20, April, 2021

माओवादीबाट निर्वाचित वडा सदस्य गुरुङलाई सांसद दवाडीले कांग्रेसमा भित्र्याए

काठमाडौं । गोरखाको क्षेत्र नम्बर २ को (२) नम्बरबाट निर्वाचित नेपाली कांग्रेसका सांसद प्रकाशचन्द्र दवाडीले मंगलबार गोरखाको सिरान्चोक गाउँपालिका ७ मा माओवादीबाट निर्वाचित वडा सदस्यलाई कांग्रेस भित्र्याएका छन् ।

गुरुङले माओवादी पार्टीप्रति असन्तुष्टि जनाउँदै कांग्रेस प्रवेश गरेको बताए । मंगलबार आयोजित एक कार्यक्रममा सांसद दवाडीले उनलाई फूलमाला र अविर लगाएर पार्टीमा स्वागत गरेका हुन् । सांसद दवाडीले सोमबार अजिरकोट गाउँपालिका १ मा स्थानीयसँग समसामयिक राजनीतिका साथै स्थानीय क्षेत्रको विकास निर्माणका बारेमा छलफल र अन्तरक्रिया गरेका थिए । उनले केही दिनअघि अजिरकोट गाउँपालिका २ का १०५ वर्षका कामी गुरुङलाई आफूले लगाएको ज्याकेट फुकालेर लगाइदिएका थिए । ‘उहाँसँग लामो कुरा गरें, मेरो मन छोयो केही नसके पनि त्यतिचाँहि गरौं भन्ने लाग्यो र आफ्नै ज्याकेट लगाइदिँए’ सांसद दवाडीले भने ‘ अहिले जाडोको बेला छ, त्यति भएपनि उहाँलाई सहयोग गर्न पाएकोमा धेरै खुशी छु ।’

उनले चालु आर्थिक वर्षमा आफ्नो तलब भत्ताबाट ९ लाख रुपैयाँ सामाजिक काममा लगाएका छन् । उनले पाउने सांसदको तलव सधैं सामाजिक काममा लगाउने गरेका छन् । उनले पदमा रहँदा भ्रष्टाचार गर्ने र अकुत सम्पत्ति आर्जन गर्न खोज्ने नेताहरुलाई आफू उदाहरणीय बनेर राम्रो पाठसमेत सिकाएका छन् । प्रदेशसभा सदस्यको सपथ लिएकै दिन उनले सेवा सुविधावापत पाउने रकम आफ्नो परिवारका लागि उपयोग नगर्ने, सामाजिक काममा लगाउने घोषणा गरेका थिए । संसद बैठक भएका बेलामात्र प्रदेशको राजधानी पोखरा जाने गरेका उनी अधिकांश समय जनताको बीचमा नै हुन्छन् । ‘म त वडाध्यक्षजस्तै भएको छु, सधैं गाउँघरतिर नै हुन्छु’ उनले भने ‘अरु नेता गाउँ नै फर्केनन् निर्वाचन जितेपछि भन्ने आरोप लाग्ने गरेको छ, म धेरै गएपछि जनताले कति धेरै गाउँ आएको होला यो सांसद् भन्न थालिसकेका छन् ।’

निर्वाचित भएको वर्ष १२ लाख, पछिल्लो वर्ष १० लाख रुपैयाँ सामाजिक काममा लगाएका उनले २०७६ पुसदेखि २०७७ पुससम्म ९ लाख रुपैयाँ विभिन्न संघ संस्था तथा व्यक्तिलाई सहयोग गरेको जानकारी दिएका छन् । आफ्नो सेवा सुविधामा पाएको रकममा व्यक्तिगत रकम थप गरेर सहयोग गर्दै आएको दवाडीले बताए । उनले आफूले निर्वाचन क्षेत्रका नागरिकको स्वास्थ्य उपचार, विकास निर्माण, शिक्षा र कृषिजस्ता विषयमा सहयोग केन्द्रित गरेको बताए ।

‘कोही बिरामी हुँदा अस्पताल पुगेको छु, कतै बाटो नहुँदा डोजर लिएर पुगेको छु, कुनै क्लब र आमा समूहलाई गाह्रो पर्दा नपुगेको ठाउँ छैन, स्कुलका बाबुनानीको किताब र कापीका पानादेखि किसानको खेतबारीसम्म  सघाएको छु’ उनले भने । उनले ‘मेरो राजनीति समाजकै टेवाका लागि, मेरो राजनीति तपाइहरुकै सेवाका लागि’ भन्ने नारा बनाएर काम गर्दै आएका छन् ।

दवाडी गण्डकी प्रदेशसभामा नेपाली कांग्रेस संसदीय दलको प्रवक्ता छन् ।