Tuesday, 20, April, 2021

दार्चुलामा भारतले फेरि सीमा मिच्यो

दार्चुला, भारतले अन्तर्राष्ट्रिय सम्झौता उल्लंघन गर्दै नेपाली भूमीमा भारतले एकतर्फी तटबन्ध निर्माण गर्न थालेको छ । महाकाली नदीको प्राकृतिक बहाव अवरुद्ध पारेर भारतले पुनः सीमा मिचेको छ । २०७० असार २ गते महाकाली नदीमा आएको बाढीले महाकाली नदीले नेपालतर्फको भू–भाग कटान गर्दा नेपालको भूमी भारतपट्टी परेको छ । त्यही भूमिमा भारतले अहिले बाँध निर्माण गरिरहेको हो ।

पुस १ गतेदेखि एकतर्फी रुपमा महाकली नदीमा बाँध निर्माणका काम थालेको भारतले नेपालले पठाएको पत्रको समेत वेवास्ता गरेको छ । दुई देशको सीमामा केही काम गर्नुपरे दुवै देशको समन्वयमा काम गर्नुपर्ने अनराष्ट्रिय नियम छ । तर, भारतले त्यसलाई उल्लंघन गर्दै मनलाग्दी तरिकाले नेपाली भूभागमा बाँध निर्माण गरिरहेको छ ।

महाकाली नदीको बाँध निर्माण गर्ने क्रममा उसले ठूला यन्त्र उपकरण प्रयोग गरेको छ । ढुुङ्गामाटो नदीमा फाल्दा भारततर्फको भाग अग्लो भइ नदीको बहाव नेपालतर्फ फर्किएको छ । समन्वयविना बाँध निर्माण थालेपछि दार्चुलाका प्रमुख जिल्ला अधिकारीले भारतको धार्चुलाका उपजिल्ला अधिकारीलाई पत्र लेख्दै समन्वयविना भएको बाँध निर्माण तत्काल रोक्न आग्रह गर्नुभयो ।

पत्र पछि पनि काम रोकिएको छैन । कामको गति केही कम गरे पनि अहिलेसम्म बाँध निर्माण भइरहेको दार्चुलाका सहायक प्रम्ुखजिल्ला अधिकारी ज्योत्स्नना भट्ट जोशीले जानकारी दिनुभयो ।
२०७० मा आएको बाढीपछि नेपाली पक्षले बाँध निर्माण गर्न लाग्दा भारतीय पक्षले काममा अवरोध गरेको थियो ।