प्रमुख समाचार विश्व

इन्डोनेसियाको पपुवामा भीषण बाढी, कम्तीमा ७३ जनाको मृत्यु

सोमबार, ४ चैत, २०७५
काठमाडौं, इन्डोनेसियाको पूर्वी प्रान्त पपुवामा आएको भीषण बाढीमा परेर कम्तीमा ७३ जनाको मृत्यु भएको छ । ६० जना बेपत्ता छन् । दर्जनौं घाइते भएका छन् ।

बाढीप्रभावितहरुलाई उद्धार गर्न ठूलो संख्यामा उद्धारकर्मी परिचालन गरिएको छ । विकट क्षेत्रका गाउँसमेत बाढीप्रभावित भएकाले उद्धारकर्मीहरुलाई समस्या भएको छ । विकट क्षेत्रको तथ्यांक आइनसकेकाले मृतकको संख्या अझै बढ्ने अनुमान अधिकारीहरुले गरेका छन् । बाढीका कारण सडकहरु अवरुद्ध भएका छन् । कयौं घर डुबानमा परेका छन् । सरकारी अधिकारीहरुले बाढीका कारण कम्तीमा चार हजार मानिस विस्थापित भएका जनाएका छन् । कतिपयलाई सरकारी भवनमा आश्रय दिएर राखिएको छ ।पक्की पुलसमेत बगाएको र ठाउँ–ठाउँमा बिजुलीका पोल र रुख ढलेकाले यातायात सेवासमेत अवरुद्ध बनेको छ । इन्डोनेसियामा गत अक्टोबरदेखि अप्रिलसम्ममा पाँचपटक बाढी आइसकेको छ । भारी वर्षा जारी रहेका कारण बाढी अझै केही दिन आउनसक्ने अनुमान गरिएको छ । शनिबार साँझदेखि परेको अविरल वर्षाका कारण इन्डोनेसियामा बाढी आएको हो । (एजेन्सी)